FBI

嘉欣 BB搵龜陪瞓

最近睇電視，晚晚都見到鍾嘉欣喺重播緊嘅《溏心風暴》裏面暗戀師兄林峯，經常搞到又喊又笑，少女情懷滿瀉。

雖然套劇已經係 6年前， 29歲嘅嘉欣 BB，到𠵱家都一樣 keep住隻少女味。 FBI講堅，上週六（ 3日）下晝， FBI喺將軍澳 Popcorn商場撞到嘉欣 BB同助手行街街。嘉欣 BB先入書局睇書，之後入咗一間精品店即成個生猛晒，見到一堆公仔仲攞上手嚟玩，千揀萬揀，最後買咗隻大眼龜布公仔 Nai Nai，之後喺微博宣布，以後 Nai Nai會陪自己瞓，成個細路女咁。
雖然嘉欣 BB要攬公仔瞓似足𡃁妹，但一講到做嘢，佢就 10級認真㗎。有二五講畀 FBI聽，今月 22及 23日喺九展開騷嘅嘉欣，雖然忙住拍新劇《飛虎 2》，但為咗以最佳狀態出騷，一有時間就去做 gym、跑步同游水。咁鬼勤力，抵佢咁多人鍾意嘅！

當日，嘉欣喺微博宣布同新買返屋企嘅 Nai Nai做朋友，仲講明以後個新朋友會陪佢一齊瞓。相信好多嘉欣男 fans睇到，好想做呢隻龜囉！ 

上週六（ 3日）下午，嘉欣 BB由助手陪住一齊行精品店，其間見到一堆大眼龜布公仔 Nai Nai，即攞上手揸住唔放，之後仲笑到收唔到掣話好得意。出名慳家嘅嘉欣，最後用 149蚊買咗隻粉紅色大眼龜返屋企，成個𡃁妹咁款。 

平時似大細路，但一做嘢就超認真，上週五（ 2日）下晝，嘉欣 BB就同 Bosco去到石硤尾幫間新開酒樓做開幕禮，仲着晒晚裝出動，搵錢梗係要隆重啲啦！

除月尾開騷外，嘉欣𠵱家又同馬德鐘一齊拍緊《飛虎 2》。劇中，嘉欣將飾演警察臥底潛入黑社會攞料，聽講個角色會演繹情緒崩潰，又係發揮演技好機會。 

買公仔之前，嘉欣曾去書店揀書，中文唔多好嘅嘉欣，專攻烹飪書，可能因為多圖畫，可以睇圖識字。不過 FBI估佢一定係想學整餅畀男友伍允龍啦！ 


撰文、攝影： FBI

(繼續閱讀...)